Culinair 7 STOPVAARVE door: Gerrit Blaauw Kookgarage

STOPVAARVE

Stopvaarve hait dit gerecht. ’t Is ook n kloete eten wat dat betrift. En dat is t nait allenneg. Stopvaarve is ook goud veur joen daarms. Dij komen, zeg mor, vanzulf goud in bewegen. Stopvaarve is hail gezond. Bonen sowieso, mor stopvaarve geft ook hail veul energie aan joen lichoam. En mit de verkaizens veur de gemainteroad in zicht, is t ook verstandig om de gemainte even duchteg wakker te schudden. Noa t eten van stopvaarve begunt t oardeg te rommelen en te roeken. Op zien hollans: ‘Laat ze een poepje ruiken’. t Zal der gewoapend heer goan, most rekenen. Schiere kost dus op de dag van de verkaizens.

Wat hebben wie neudeg?
Ongeveer twij pond melige eerappels en vaar onse dreuge broene bonen. En wieder n snittertje zolt, wat peper en twij of drij onse vet spek. Om t gehail wat aan te klaiden kist stopvaarve ook nog verbeteren mit zoere siepeltjes, augurken, piccalilly en dat soort eterij. As t n stokje vlaais extra hebben wulst: n rookworst, n gehaktbaale of n gekruud speklapje is ook nait maal. Om de haile handel wat smeuïg te kriegen is n flotter koumelk of n beetje boter wel te doun. Broene bonen binnen ook in blik. Veurdail is dat ze goar bennen. k Heb zulf laiver de gele gedreugde bonen.

En hou mok st dat?
e bonen mouten eerst n haile dag en nacht in t wotter stoan. Zo worden ze waik. Den kook st de bonen n uurtje. Most ze eerst even aan de kook brengen en den nog n uurtje op leeg vuur goar mokken. Ondertussen schil st de eerappels. Snie stok vet spek ook direct mor in dobbeltjes. As dat aal zowied kloar is, den ken der kookt worden. Zet de eerappels mit n snufke zolt op, zoas je wènd bennen. Kist kaizen om de goare bonen der bie op te doun, mor dij kist eventueel ook apaart nog even zachtjes deurkoken. Zet n bakpannetje op en bak t vet spek even rusteg oet. Noa t koken even de eerappels dreuge stomen en meng den t oetgebakken spekvet mit n beetje peper deur de massa. Stamp t goud deur.

As de massa te stief is, dou der den n scheutje melk in of n stokje boter. Is ook lekker veur de smoak. De stopvaarve is zowied kloar.

En hou eten wie dat den op?
Pane kin gewoon op toafel stoan. Zet der bakjes met wat zoere goudje (augurk, piccalilly, zoere siepeltjes) bie. En as t wulst n sjupane mit gehaktballen of n schoale mit lekkere speklapjes en rookworst. Mor dat huift nait perzee. En verder zet st de tellers en t raive op toafel. t Feest ken begunnen. Sommegen bennen even stil en aandern vallen vot aan. Dat mout je mor veur joezulf oetmokken.