Culinair 6 : STAMPOT KNOLLEN door: Gerrit Blaauw Kookgarage

 

STAMPPOT KNOLLEN

Vrouger aten wie met regelmoat knollen. Dat bennen van dij grote ronde kringen dij in blokjes sneden worden. Maistieds werden de gekookte geel, lichtoranje knollen met eerappels stampt. Echte winterkost dus. De stamppot smuik wat licht zuiteg, mor nait kweerzuit ofzo. De knollen hebben n typische reuk en smoak. ‘Koolraap’ wordt knollen in t hollans nuimt.

Wat hebben wie neudeg? Ongeveer twij pond eerappels en n knolle. En veur t griepen n klont boter of wat vet spek, n snittertje zolt, beetje koumelk. En verder wat je veur joezulf wend bennen.

En hou mok st dat? De melige eerappels en de knol mouten schild worden. Snie ze in grovve blokken en den even òfspuilen in wotter. Dou de eerappels en de knollen nait vot bienander in ain pane. Pak dus even twij pannen. De knollen in de pane, beetje wotter der onder en n snufke zolt derbie. Zet ze op het gas… of beter nog op n elektrieke kookploate. Wie mouten ons gas spoaren ja, want aans rommelt t veulsteveul onder onze Grunneger grond. Noa tien minuten koken mouten de eerappels op de kookploate. Schep den vot de knollen op de eerappels. Loat alles koken totdat de eerappels ook goar bennen. Eventuele kookvocht der ondervot hoalen en even dreuge stomen. Pak doarnoa n stamper en stamp alles mit n klont boter of mit oetgebakken vetspek. De stamppot wordt den lekker smeuïg. Eventueel nog n beetje zolt der overhìn en de stamppot is zowied kloar. Wieder kist der bie t stampen ook nog n scheutje koumelk bie doun.

En hou eten wie dat den op? Zet de tellers, beetje raive en de pane mit stamppot op toafel. Schep t eten op dien teller en val aan. De aine dut der wat stroop bie en d aander streut der wat gele basterdsuker over. Mor was t ook doun kist is n speklapje oetbakken. Den hest ook vot wat sjuu. Gound dij gain vlees eten, broeken ook gain vetspek. Dij luu streuen der wat òlle keze over. Dat is ook lekker bik. n Ainzaalm hier en doar eet der n zoere heern bie. Ik zòl zeggen: ‘Lekker bikken en achiele tov’.