Mosterd noa de moaltied
Mien opa en mien voader wazzen landaarbaaiders en hebben ook slim leden onder t bewind van de hereboeren. Zai wazzen den ook overtuugde communisten en opa dee mit aan de landaarbaaidersstoaking woarbie Etje Siemens door de marechaussee doodschoten werd. “
Finnerwold, Beerte, Drijbörg, Schanze dat was t rode bolwaark van de communisten. In het Christelieke Midwolde en Oostwold was dat totoal aans. Dat was in dij tied nog de zwaarte kouzenkerke!!
Wait je wel woarom der bie Stokartonfebriek de Toukomst in Scheemde nooit stoakt is? Omdat de Christelieke boeren, de aandailholders van de febriek, in de kerkeroad, t aarmbestuur en de gemainteroad zaten. As je aan n stoaken mitdeden was je aan de beurt.
Ontslag, gain waark, mor den ook bie gain aine, gain steun, niks van t aarmbestuur. Je konden verrekken van honger en ellende. Dat was de echte Christelieke gedachte van heren van dou.
Dat de rooien aans wazzen en wel leufden in t gedachtengoud van Lenin en Marx was den ook nait zo verwonderliek. Frank Westerman bescheef het goud in zijn bouk de Groanrebubliek.
Dat nou nota bene n D66er op de Kromme Elleboog een centrum der hin zet het over t verleden van het Communisme in de Groanrepubliek vaalt heur en heur man te priezen. Ik ken Henriette en heur Freek en t binnen hail laive en oprechte lu en het is der beslist n kiekje weerd en vergeet den nait n Fadderrakje te kopen. Slim lekker zegt mien vriendin.
Mor nauw binnen t weer de Cocksioanen dij de geschiedenis nait onder ogen zain willen. Allint haiten ze nou CDA. Ik nuim dat geschiedenisvervalsing. Lenin dut der gain mens kwoad in achtertoene van Henriette Davelaar net zo min as de toenkabouter van CDA wetholder Tim van Bostelen .
Ook al is t beeld negen meter hoog, baauwkundig het t bronzen beeld in de tied wel bewezen dat e slim stabiel is, dus dat kent ook nait wezen dat het nait mag van de gemainte Oldambt.
Wat blift der den nog over als argument van de CDA wetholder Tim van Bostelen? Joa negen meter, das n haile grote kerel. Mor as de overhaid begunt te oordailen over wat KUNST betaikent, den gaait het goud mis.
Kunst mag schuren. Kunst mag irriteren. En kunst mag zeker herinnern aan dingen dij we laiver vergeten. As we kunst goan weren omdat der messchain aine zok der aan zol steuren, holden we dammee allint nog toen kabouters over toch? Kiek even noar t slavernij monument!!!
Ain ding is zeker: Lenin krigt op dizze menaaier meer aandacht den ooit. Het verleden van het communisme ook.
Mien advies aan Henriette en Freek zet hom der gewoon hin en as ze klachten hebben den te richten aan “Lenin Over de schutting Kromme Elleboog” Hai nemt alle bezwoaren in ontvangst!!!
Knolntrekker
