ARRETJESCAKE
n Nije gemainteroad komt der aan. Veural de wat oldere luu zain de verkaizens as n soort feest van de democroatzie. Doar kennen wie ons wel wat bie veurstellen. Ainmoal in de vaar joar mag je besloeten wel t dameet aal veur t zeggen het in t Oldambt. Denk nog even goud noa veurdat je joen hokje rood mokken. Wul je deur zoast is of mout der wat verandern.
De VCP wait t wel. As je op onze partij stemmen: Noamens de haile ploug BEDANKT!
Zo en nou goan wie dikkedakken! De kookgarage zet ons weer wat schiers veur. As kinder werden wie vrougerheer aalgedureg verrast. Wie kregen den twij meelkoekjes mit n loag boter der tussen. Den was t feest bie ons in hoes. En as t hail schier ging, den muik moeke ‘arretjescake’. Hest der gain oven veur neudeg en dat scheelt hail wat waark. Dus as der n poar stuvers over was den was t feest bie ons. De leste tied is arretjescake weer hailmoal terogge. De maist geweldege rezepten komen langs op de kompjoeter. Elk het zo n aigen rezept van arretjescake. Ik broek nou altied roomboter. Vrouger was roomboter te duur en wer dus vet broekt. Schone frituurvet. Dat muik arretjescake wat stiever den mit roomboter.
As je denken dat Arretjescake n echte Grunneger lekkernij is. Dat is nait zo. In de haile wereld wordt op elk zien aigen wieze ook wel dit soort caken mokt. Mor ja tou mor. Hier stait t bekend as n rezept vanoet onze pervinzie.
Wat hebben wie neudeg? Veur dizze cake broek ik drijennhaalve ons haarde roomboter. Dus nait van dat smeuïge goudje dij s t te duur in de winkel koopst. Gewoon de goedkoopste pakjes roomboter. 350 gram dus. Verder: Vaar onse gewone of basterdsuker, Vaar frizze tuutaaier, zo n beetje vaar onse meelkoekjes (theebiskwiets) en acht tot tien eetlepels echte cacaopoeder. Wieder hest nog n cakevörm neudeg. n Gewone laange cakeblik of n springvörm of wat den ook. En dat is t wel zo ongeveer. Zulf vervang ik een beetje suker ook wel veur n zakje vanieljesuker. Ach en zo kist der van alles van mokken.
En hou mok st dat? k Breek eerst de koekjes. De boter (of t vet) loat je smelten. Dou dit smelten veurzichteg in n steelpannetje. Aignlieks broeken je allent t vetgedailte van de roomboter, mor ik loat de melkresten der gewoon in.
In n aander bakke klop ik de raauwe tuutaaier (dooier en aiwit) op. Den dou k de suker bie de aaier in en klop k dat deurnander. Bie de suker en de aaier schep ik mit n lepel de cacao der deur. k Klop t nog keer op en den is t zo wied om de koekjes der bie in te doun. Mit n lepel ruier k dat deur de sokkeloamengsel. De waarme gesmolten boter gooi k der den pas bie. Eerder nait, want aans nemen de koekjes al t botervet op. Nou hest n mooie prane mit heerleke sokkeloa. k Neem de vörm, ik vet om wat in (kin ook mit plestieken folie of mit vetvrij papier) en lepel den de sokkeloa der in. En den gait e mooi de koelkaaste in en loat om n dag rusten. De cake wordt den mooi haard en ’t is ook veul lekkerder. Even goud kold hollen. Wat k ook nog wel ains dou: den smelt k n reep bittere sokkeloa en as k de kolle cake oet de koelkaaste hoal, den smeer ik om der hailmoal mit in. Lekker hor. As de cake nou nait oet de vörm wul: Even n seconde in hait wotter hollen. Den wult wel.
En hou eten wie dat den op? Gewoon op n schuddel en den lekker kliedern. k Dou der ook wel ains n flotter slagroom bie om der nog meer genot oet te hoalen. En as t hail schier gait den mok k nog wat Westerlijse kaarzen waarm. Schep suker de bie in en dat leg k den bie de slagroom en de arretjescake.
Arretjescake is lekker en t is n groot genot, mor neem der nait te veul van. Der zit nogal wat in en veur dat je waiten ken je der nait oaf blieven. As je teveul kriegen en dat is overal zo mit, den is dat nait goud. En zeg nou zulf: elke dag n gebakje is gain gebakje. t mout wel n verrassen blieven.
