Column van Knollentrekker

Column “Mosterd noa de moaltied.”

Oldambsters vuilen zok voaker “nait gezond” stond der vandoage mit vette letters in t Nijsblad. Hou zol dat toch kennen. Joa, 31 % vuilt zok nait gezond in t Oldambt stait in het rapport “Positieve Gezondheid en Sport”. Doarmit beheurt de gemainte Oldambt tot de top van Nederland. As je nou, as gemainte, nait echt geweldige kwaliteiten hebben, is t wel hail geweldeg om toch aargens in oet te blinken, of nait den?

Wetholder Erich Wunker wil der wat aan doun las ik in de kraante. Nou ken ik de wetholder wel en de mainste Oldambsters ducht mie ook wel. Zeg nou zulf; Wunker het t persoonliek ook nait zo op gezond leven begrepen, ducht mie. Hai is schier aan de moat en het hail wat kilo’s te veul en krigt d’kop aalsmor dikker. In de kraante zegt hai, dat hai t rapport ter goudkeuren aan de gemainteroad wil veurleggen.

Nou heb ik even keken op de website van de gemainte noar de foto’s van de gemainteroadsleden en heb t idee dat dizze lu nou ook nait echt de professionals van sport en het gezonde leven binnen. Wunker zegt dat e hoopt dat de gezondhaidsachterstanden de kommende joaren minder groot kennen worden. Hai hoopt!!!! Nou hopen, dat doun eulifanten ook! Haile dikke bulten zulfs. Mor ik ken joe nou al wel bie veurboat zeggen dat dit hopen van hom, niks wordt. Kinder bewust moaken van gezonde voeding?

Hou bedenk je het. Is dit n toak van de gemainte? Ik docht dat dit meer n toak van ol lu van de kinder is. Oldern wil hai ook meer aanbaiden om zok meer te bewegen. Hou duurft hai t zeggen! t Zwembad en sporthal De Hardenberg in Finnerwold mouten dicht omdat e der gain centen veur over het. (Veur idiote plannen veur nij Gemaintehoes des te meer.)

Inwoners dij n oetkeren kriegen, willen ze actief loaten wezen bij onze sportverainens, mor dij zulfde sportverainens in Finnerwold, Oostwold en Beerte draait hai de nekke om omdat dij gain onderkommen meer hebben. En den mouten der buurtsportcoaches kommen dij dat regeln mouten dat de oldern in bewegens komen. Wat veur n prieskoartje hangt doar den aan? Of worden dij sportcoaches mit gezonde worrelplakken oetbetoald en as toetje n gruin bladje sloa? Ik heb nog nooit zoveul onzin heurd. Woar hoalt hai t vot?

Wetholder Erich Wunker neem van mie n goie road aan: Loat de Hardenberg nou gewoon zien gang goan en geef hun de centen dij hun toukomt. En dou veural zulf ook ains duchteg aan sport; n 20 kilo der of zol die nait misstoan en t geft die vast n aandere kiek op t “gezonde” leven.

Knollentrekker.

1 reactie

    • Hennie op 8 januari 2023 om 19:57

    Kan t niet beter verwoorden

Geef een antwoord

Jouw e-mailadres wordt niet gepubliceerd.