KRÌNTJEBRIJ
Om t waarm eten òf te sloeten is krìntjebrij wel lekker vris. Kist t waarm of kold eten. Hollanders nuimen krìntjebrij ook wel ‘watergruwel’, mor zeg nou eerlek: ‘Krìntjebrij klinkt toch veul schierder?’
Wat hebben wie neudeg?
n Onse görte, even meer as n kan wotter oet de kroane, anderhaalf ons krìnten. De helfte van de krìnten mag ook vervangen worden deur rezienen. Verder om en bie n ons suker. Aalbeernsap (om en bie n halve liter), vrizze rode vruchten ( gezoamlek om en bie drij onse). En verder n piepkenail, drij kruudnoagels en ain sitroune.
En hou mok st dat?
Zet alvast de krìnten en eventueel de rezienen in wat wotter te waiken. En den gewoon de görte, mit de schille van ain sitroune goud deurkoken. As dizze mengsel goar is, hoal st de schille der weer oet. De kruudn, de natte krìnten en rezienen, de rode vruchten, t sap, de suker bie de görte doun. Doarnoa zet st de haile handel op n leeg vuur en loat st dat lij deurkoken. As alles n beetje ain gehail is en de vruchten ben zo’n beetje stokkend kookt den is t wel zo’n beetje kloar. Dou de sitrounesap der ook mor bie, want wat most der aans mit. Dat zoere van de sitroune mokt t ook lekker vris. Op t lest even veurpruiven. As t nou te zoer is, den dust der wat extra suker bie. n poar krummels zolt ken de gehaile smoak verbeteren. Den hoalst de piepkenail en de kruudnoagels der ook weer oet, want dij hebben heur waark wel doan. En kloar ist.
As der nou even wat extroa’s bie mout: Gooi der den n slokje rode wien bie. Kook dij wien even mit, want aans hei je om dameet om.
En hou eten wie dat den op?
Of doe hoals t de brij kold oet de koelkaaste of doe waarmst de haile handel even op n leeg vuurtje op. Veur elk is der wel n schoaltje vol, dus kist de krìntjebrij zo mit n lepeltje noar joen mond heveln. Wat der op t heden ook wel gebeurt: de krìntjebrij bie vanieljevla serveren. Das ook lekker.
As t krìnten nou nait te proemen vinst. Vervang dat den deur kaarzen. En gebroekst nou ook gain görte mor wel rode wien en dus t der ook nog t sap van n appelsiene bie, den nuimen de poepen dit ook wel ‘Rote Grütze’. En zo hebben alle streken of landen wel heur aigen ‘krìntjebrij’.
Gerrit Blaauw – Oldambtster Kookgarage.
