BLOUDWORST MIT APPEL (& STROOP)
Vrougerheer haar elkenain wel n swientje op stale. As e ‘kloar’ was, den wer e slacht. Mit t bloud muiken mensken ook wel bloudworst. Bloudworst was gezonde kost en zo wer alles van t swientje broekt. Der wer veurheer niks votgooid. In t Oosten van t laand wur der voak spek in stopt. Rezienen waar n hier wat meer gebrukelk. Summege bakken der siepels bie. Bloudworst komst overal wel tegen. Elkse streek het zo zien aigen rezept. In Engeland nuimen ze bloudworst ‘Black pudding’. Wat hebben wie neudeg?
In ons geval broeken wie n haalve kan bloud van t swien. Twij pond roggemeel, (sums ook mit n dail hoavermout), anderhalf teelepeltje zolt, beetje peper en wat kruudnoagel. En wieder hebben wie neudeg: 275 gram rezienen, Der bìnnen gounend dij wat ruzzel en of siepel oetbakken. Verder heurn der appels in schiefkes (aandern nemen stroop) bie en boeskool. In dit geval de rooie boeskool.
En hou mok st dat?
Eerst even de rezienen even spoulen. Zeef t bloud. Aans komen der haarde stokken en aander rommel in. Bloud even goud deurruiern. Den de rezienen, t meel, t zolt, peper en de kruudnoagel der bie. Kneed de haile mikmak tot n nuver deeg. As t zowied is den is t tied om t deeg tot twij broden te vörmen. Mok de broden goar in n pane mit licht kokend wotter. Dat duurt om en nebie n uur. En doarnoa mout de worst kold worden.
Bak de appelschieven in n bakpane en dou dat ook mit de ruzzel en of siepel. Kook de boeskool op joen aigen wieze. Toffe bik. En hou eten wie dat den op?
Snie de bloudworst in plakken. Bak de plakken aan twij kanten. As de worst zowied kloar is, neem der den wat opbakken appels bie en (rode) boeskool. Dwarrel der wat zuite stroop op en as t dat wulst: eetst de opbakken ruzzel der bie op.
Gerrit Blaauw – Oldambtster Kookgarage
