ZOEPENBRIJ
Zoepenbrij wordt in t hollans vertoald tot ‘Karnemelksepap’. ‘Zoepen’ hait den ‘Karnemelk’. Aignlieks was t doaglekse kost. Zoepenbrij ston zomor ‘smeurns, om middag en soavens op toafel. Tegen oavenstied ston pane gewoon weer op kachel. Zoepenbrij wèr kold en waarm eten. Der mos vrougerheer gewoonweg n beule in t lichoam verbrand worden en zoepenbrij was nait te duur. Der bennen aignlieks twij soorten. Zoepenbrij mit Görte en Zoepenbrij mit meel. Görte mout veuròf wel n halve dag waiken in wotter. Wat hebben wie neudeg? Veur n man of vaar en mit Görte: Ain kan zoepen, n onse görte, n snitter zolt.
En mit meel: Ain kan zoepen, zesteg gram meel (bloem), n snufke zolt.
En veur de smoak: boter, suker en/of stroop. En hou mok st dat? 1. t Görte in t waikwotter n uurtje koken, wotter òfgaitn, dou de zoepen en t zolt der bie. Even deurkoken. 2. Kist ook t görte en t zolt in de zoepen anderhalf uur deurkoken. As de handel nait dik genog is, kin der altied nog n lepel vol aangelengde meel in. 3. En mit meel: vermengst de meel mit t zolt en mit de zoepen. Goud mengen, want aans zitten der kloeten in. De haile handel op t vuur en opkoken. Wel ruiren blieven aans wordt de handel broen. (of zwaart). As de brij bieleutjen kloar is, dat vernemst ja wel, den nog even zachtjes n poar minuten noaprutteln. En hou eten wie dat den op? ’s Meurns kist der n plak roggestoet bie nemen. Om middag eten ze de brij maistieds noa stamppot en ’s oavens werd de brij opwaarmd. Om de handel n beetje lekker te mokken kist der boter, (witte of broene) suker en of stroop op doun. Der waren ook gounend dij der nog wat kenaail op strooiden.
